ياشوق قلبي فيك مغـرم ومذبـوح
قلبي عناوين الغلى لـك وضعهـا
ماتدري أنك ساكن ٍ مهجة الـروح
روحي وروحك رب الأنفس جمعها
القلب يشكي من سبايبك مجـروح
أرحم مـود ٍ لـك حياتـه دفعهـا
أشوف دمعك فوق الأوجان مفضوح
عبـرات حزنـك ردهـا لاتدعهـا
لو جت على كيفي تمنيت مـاروح
نفسي على المجلاس زايد ولعهـا
وأنت بحلاك وزايد الزين مملـوح
وصورتك من برواز فكري بدعهـا
أخلصت في حبك ونا أقول مسموح
أنت المود اللي حياتـي شرعهـا
لارحت ياخذني مع الهجس لاافوح
ون جيت تبرا علتي مـن وجعهـا
عامين بحساب الليالي على اللوح
ياكنهـا عشريـن عـام ٍ تبعهـا
البعد مالي فيـه يازيـن مصلـوح
حدتني أظروفي ونا ضعـت معهـا
لابد أنا مأتيك لـي يـوم وبـوح
وحكي عن الغربه وقصة وجعهـا
